Alańda Ishki ister departamentiniń qyzmetkerleri 6 qorapta sap túzedi. Saltanatty sharaǵa Qazaqstan Respýblıkasynyń Týy ákelinip Memlekettik Ánurany yrǵaǵymen ashyldy. Odan keıin QR Ishki ister mınıstri polısııa general-polkovnıgi Qalmuhanbet Qasymovtyń arnaıy quttyqtaý jedelhaty oqyldy.
Qyzylorda OIID bastyǵynyń orynbasary Jaras Ospanov sóz alyp, jınalǵan qaýymdy merekemen quttyqtap, «Konstıtýsııa kúni» merekesiniń polısııa qyzmetkerleri úshin erekshe mańyzdylyǵyn atap ótti.
Budan keıin, shara barysynda Ishki ister mınıstrliginiń jáne oblystyq ishki ister departamenti bastyǵynyń merekelik marapattaý jaıly buıryǵy jeke quramǵa tanystyrylyp, qyzmette kásibı biliktiliginiń arqasynda jaqsy kórsetkishterge qol jetkizgen, qyzmettik mindetin qajyrly ári adal oryndaǵan ishki ister organdarynyń 16 qyzmetkeri Ishki ister mınıstriniń quzyrymen, 149 qyzmetkeri departament bastyǵynyń quzyrymen marapattaldy.
Atap aıtqanda, QR IIM «Qurmet gramotasymen» JPQ-niń jol-patrýldik batalonynyń komandıri polısııa polkovnıgi Ádenov Qaırat, «Quqyq tártibin qamtamasyz etýde qosqan úlesi úshin» medalimen Ekstremızmge qarsy is-qımyl basqarmasynyń bastyǵy polısııa polkovnıgi Qýanysh Orazov, «Ishki ister organdarynyń úzdigi» tósbelgisimen JPQ batyǵynyń orynbasary polısııa maıory Ospanov Azamat marapattaldy.
Saltanatty jıyn sońy jas qyzmetkerlerdiń ant qabyldaý rásimine ulasty. Polısııa qataryna jańa qosylǵan 20 jas maman qyzmetti adal jáne abyroımen atqarýǵa, Qazaqstan Respýblıkasy azamattarynyń quqyǵy men bostandyqtaryn qorǵaýǵa saltanatty túrde ant berdi.
Áskerı ómirge aıaq basqan jas býyndy aıtýly kúnderimen ishki ister organy ardagerleriniń atynan Qyzylorda QIIB-nyń Ardagerler keńesiniń tóraǵasy Almaǵanbetov Jaqsylyq quttyqtap, azamattyq boryshtaryn abyroımen atqarýlaryna tilektestik bildirip, ystyq yqylasyn jetkizdi.
Merekelik shara jeke quramnyń saltanatty sherýimen aıaqtaldy.
